មិត្តប្រុសចង់បែកគ្នាតែអ្នកមិនចង់ គួរធ្វើយ៉ាងម៉េចល្អ?
ការបែកបាក់វាតែងតែមានក្នុងទំនាក់ទំនងស្នេហា តែអ្វីដែលសំខាន់នោះអ្នកទទួលយកបានឬក៏អត់ បើអ្នកកំពុងតែពេញស្រឡាញ់គេនោះ។ ពេលនេះអ្វីដែលអ្នកគួរធ្វើដើម្បីអាចបានគាត់មកវិញនោះគឺ៖
1. ឲ្យគាត់សម្រាកសិនទៅ៖ គួរតែដកឃ្លាពីគាត់មួយរយៈ ហើយឲ្យគាត់ធ្វើអ្វីតាមតែគាត់ចង់ធ្វើទៅ។ ប្រហែលជាគាត់ចង់មានពេលផ្ទាល់ខ្លួនច្រើនជាងនេះ ហើយមិនចង់ធ្វើអ្វីឲ្យពាក់ព័ន្ធនឹងអ្នក ដូច្នេះអនុញ្ញាតឲ្យគាត់សម្រាកសិនទៅ ប្រហែលបែបនេះគាត់អាចយល់ពីខ្លួនគាត់ និងយល់ពីអ្នក។
រូបតំណាង
2. ចៀសវាងការដេញដោលឬនិយាយច្រើនជាមួយគាត់៖ បើសិនជាគាត់ចង់ចាកចេញពីអ្នកហើយនោះ សូមកុំព្យាយាមនិយាយច្រើន និងទាក់ទងទៅគាត់ច្រើនដងអី។ បើសិនជាអ្នកធ្វើបែបនេះដើម្បីចង់បានគាត់មក នោះគឺខុសហើយ គាត់ប្រហែលជាចាកចេញរឹតតែឆ្ងាយពីអ្នកព្រោះតែភាពស៊ាំញ៉ាំរបស់អ្នក។
3. រក្សាទំនាក់ទំនងជាមួយគាត់កុំឲ្យដាច់៖ ចំណុចនេះមានន័យថាអ្នកត្រូវតែរក្សាការទាក់ទងគាត់ ប៉ុន្តែយូរៗម្ដងបានហើយ ឬក៏ចាំគាត់ CALL ឬផ្ញើសារមកចាំឆ្លើយតបទៅវិញដោយភាសាធម្មតាៗទៅទើបល្អ។
4. កែប្រែចំណុចខ្វះខាតរបស់អ្នក៖ ទុកពេលវេលាសម្រាប់ពិចារណាពីខ្លួនឯង បើមានអ្វីមិនល្អកែប្រែចេញទៅ ហើយត្រូវរៀនធ្វើជាមនុស្សដែលរឹងមាំ មិនមែនធ្វើអ្វីតាមតែចិត្តនឹកឃើញដូចក្មេងមិនដឹងអីនោះទេ។ ចំណុចនេះអាចឲ្យអ្នករៀនស្វែងយល់ពីខ្លួនឯង និងធ្វើឲ្យគាត់យល់ថាអ្នកជាមនុស្សស្រីដ៏ល្អម្នាក់ដែលមិនគួរឲ្យរបូតពីដៃ។
5. បង្កើនសម្រស់របស់អ្នក៖ អ្នកគួរតែផ្លាស់ប្ដូរខ្លួនឯងឲ្យទៅជាមនុស្សស្រីដ៏ស្រស់ស្អាតម្នាក់។ សាកផ្លាស់ប្ដូរម៉ូដសក់របស់អ្នក ហាត់ប្រាណដើម្បីឲ្យរាងស្អាត និងតុបតែងខ្លួនបន្តិចទៅមើល៍ ព្រោះមនុស្សទីមួយដែលកត់សម្គាល់ការប្រែប្រួលអ្នកប្រាកដជាមិត្តប្រុសអ្នកជាមិនខាន។
6. កុំមានការងប់ងុលខ្លាំង៖ កុំងប់ងុលខ្លាំងទៅលើហេតុផល ថាហេតុអីបានមិត្តប្រុសអ្នកចង់បែកពីអ្នក។ ក្នុងពេលនេះជាពេលល្អដែលអ្នកអាចយល់ពីភាពខុសគ្នារវាងអ្នក និង គាត់ ហើយអ្នកអាចនឹងដឹងពីចម្លើយនោះដោយខ្លួនឯង។
7. ចៀសឲ្យឆ្ងាយពីការធ្វើបាបខ្លួនឯង៖ កុំដោយសារតែគាត់ចង់ចាកចេញពីអ្នក ហើយអ្នកមានគំនិតចង់បំផ្លាញខ្លួនឯង ដោយយកស្រា ឬក៏គ្រឿងមិនល្អមកដាក់ខ្លួននោះទេ ព្រោះវាមិនត្រឹមតែធ្វើឲ្យអ្នកខូចសុខភាព វាថែមទាំងធ្វើឲ្យគាត់រឹតតែត្រូវបញ្ចប់ជាមួយអ្នកទៀតផង។
បើសិនជាអ្នកនៅស្រឡាញ់គាត់ហើយចង់ឲ្យគាត់ត្រឡប់មកវិញអ្នកគួរតែសាកល្បងនូវវិធីទាំងនេះ ព្រោះវាអាចឲ្យអ្នករកឃើញពីខ្លួនឯង និងអាចឲ្យគាត់យល់ពីអ្នកហើយមករកអ្នកវិញក៏ថាបាន តែអ្វីដែលសំខាន់បំផុតគឺអ្នកហ៊ានទទួលស្គាល់ការពិត។
ប្រភព៖ Kanha
No comments